image

NUWE KAMPUS / NEW CAMPUS

Pro-Ed se splinternuwe skoolgeboue op die Boabab kampus, vir die Laerskool en Kleuterskool is in 2016 voltooi. Die Hoërskool is tans nog gevestig op die Riverside kampus, maar die droom is dat hulle ook so gou moontlik op die Boabab kampus sal aansluit.

Fase 1 van die nuwe kampus is toegerus met 35 klaskamers, 7 kantore, 2 ablusieblokke, ‘n personeelkamer, kleuterskool fasiliteite en reuse speelgronde. Die totale skoolgronde beloop 10 hektaar.

Ons gee graag erkenning aan Cor Syfert en sy span van
Windhoek Consulting Engineers wat die elektriese en siviele ingeneurswerke vir ons teen GEEN/NUL/NIKS fooi gedoen het asook Christo Pieterse Land Surveyors wat al die opmeetwerk verniet gedoen. Brynard Kotze en Werner Burger se span by Brynard Kotze Architects inc. het ons mooi geboue en uitleg geteken en Koot Potgieter en sy span van JHPQuantity Surveyors moes al die bou-kosteberamings maak. Aangesien Pro-Ed as eienaarbouers moes bou, sou dit ook nie moontlik wees sonder om ons subkontrakteure gereeld by te staan met swaargereedskap en swaarvoertuie nie. Hierdie hulpmiddels is deur Vg Developers beskikbaar gestel. Die voertuie het soms oor naweke sommer net op die gronde “opgedaag” om uit te help, veral omdat hulle in die week moes werk vir ‘n inkomste! Vg Developers het ook gekwoteer om ons kleuterskool en skoolsaal te bou teen baie billike pryse, wat die ander tenderaars net nie kon bykom nie, al het hulle hard probeer.

Dit was ‘n belewenis om te sien hoe maklik hierdie manne snap dat daar ‘n groter prentjie is en dat hulle bereid was om te help om die droom te bewaarheid, sonder dat dit ‘n fortuin moes kos.

Finansiering was en bly ‘n groot uitdaging. Hier wil ons in besonder vir Leon Koch en Ansie Meyer van
Standard Bank baie dankie sê dat hulle genoeg in ons projek kon glo om finansiering, met haalbare sekuriteitsvereistes, te bewerkstellig.

Ons het ‘n leningsfasiliteit van N$10mil gekry maar die erf en substasie moes ons self betaal. Gelukkig het ons
ouers hulle hande diep in hulle sakke gesteek en soveel geloof in die projek gehad dat ons die balans van N$4mil by hulle kon leen.

Alhoewel die skoolsaal en sportvelde beplan was as deel van fase 2, is die grootste werk hieraan reeds afgehandel. Danksy Morne Burger van
Rotary Engineering en sy sportvelde span, is ons rugbyvelde grasgroen en die atletiekspanne begin in 2018 op die Boabab velde oefen. Die krieketnette is ook amper voltooi en ons nuwe krieketpitch se mat word eersdaags ingesit. Ons hokkie velde se grondwerk is gedoen, al wat kortkom is die Astro turf. Uit die monde van ons hokkie-spanne: “Indien enige iemand ‘n Astro-veld het wat rondlê, kan dit gerus aan Pro-Ed gekskenk word...”

Baie dankie aan elke ouer én besigheid in die gemeenskap, wat saamspan en ons hande vat op hierdie opwindende, nuwe hoofstuk in Pro-Ed Akdademie se geskiedenis.

Dus, om op te som. Ons is aan die einde van fase 1,5 van die Boabab kampus. Fase 2 behels die verkoop van ons Riverside kampus in Kramersdorp en die oprigting van nog 20 klasse op die Boabab kampus om sodoende die hele Pro-Ed op een perseel te kan hê.

Die pad was tot dusver vol uitdagings, maar ons kon ons Hemelse Vader se hand telkens daarin sien. Ons besef hoe afhanklik ons van Hom is. Mag hierdie nuwe skoolfasiliteite aangewend word om Hom daagliks te verheerlik!